Mill-Gabra Ta Ward - It-Tieni Ktieb

L-istejjer u l-poeżiji f’dan il-ktieb huma kollha magħżulin mis-sensiela magħrufa Ġabra ta’ Ward. Dawn is-siltiet huma fost l-isbaħ eżempji tal-letteratura għat-tfal li ħarġu mill-pinna tal-aħjar kittieba tal-Malti ta’ dak iż-żmien. F’dawn il-paġni l-qarrejja se jiltaqgħu ma’ karattri simpatiċi, temi li jolqtuhom mill-viċin, ambjent naturali Malti l-ġmiel tiegħu, logħob u bluha tat-tfulija, u kultant, ma’ xi tagħlima wkoll. U dan kollu miktub bi stil mirqum u mexxej. B’hekk, il-qarrejja żgħar se jersqu ħelu ħelu lejn id-dinja tal-qari bil-Malti filwaqt li jieħdu gost jiksbu tagħrif siewi għall-ħajja. Mhux ta’ b’xejn li dawn il-kitbiet letterarji kienu, għadhom u se jibqgħu għal qalb bosta Maltin u Għawdxin. L-għażla tal-kitbiet u l-addattamenti saru minn Terence Portelli, lekċerer tal-letteratura għat-tfal, fost suġġetti oħra, fl-Università ta’ Malta.