It-Tezor Ta Klement - Joseph Debono

Joseph Debono, attur komiku u kittieb maħbub ferm mal-Maltin, speċjalment għar-rwol tiegħu bħala James Bondin fuq il-programm Xarabank, ħalliena fl-età ta’ 63 sena fis-27 ta’ Ottubru 2021. Is-sena l-oħra kien ippubblika l-ktieb “Iz-Ziju Manwel” proġett li kien ħadem fuqu meta kien jaf li kien marad bil-kundizzjoni tal-ALS.L-aħħar ktieb tiegħu, It-Teżor ta’ Klement, kien miktub bl-għajnuna ta’ special eye-recognition programme minħabba l-kundizzjoni kritika li kien jinsab fiha minħabba l-ALS.Meta Paul irċieva l-ittra tan-nutar fuq il-Golden Dawn, qatt ma basar li kienet se tqalliblu ħajtu daqshekk.Dan l-aħħar kien sab ftit kalma mal-ħbieb, l-Ingilterra, wara t-taħwid li kien għex fl-aħħar snin. Iżda issa se jkollu jiġi lura Malta. Iz-Ziju Klement, insomma iz-ziju t’ommu, miet, u Paul kellu sehem fil-wirt.Minbarra dak li ħallielu, iz-ziju jsemmilu li hemm ukoll teżor, u ħallielu ħjiel, ftit misterjuż, biex ikun jista’ jfittex it-teżor. Din it-tfittxija tieħu lil Paul ġirja ma’ siti storiċi madwar Malta. Mhux waħdu. Għax Klement, mill-qabar, ilaqqgħu wkoll ma’ Katarin, it-tfajla li kienet tmur tgħinu.Bl-għajnuna ta’ Katarin, it-tfittxija ssir aktar ħafifa u jieħdu aktar gost jagħmluha flimkien. Tgħid jilħqu jsibuh it-teżor qabel ma Paul ikollu jmur lura l-Ingilterra?