Il-Misteri Tal-Wardija - Leonilda - Bk1

Tliet irġiel nobbli jilagħbu l-logħob tal-azzard f’razzett fil-Wardija. Majsi s-sid u ibnu Frenċ jisimgħu ħoss. Joħorġu jfittxu fid-dlam u t-tifel jisfa ferut. Issir tfittxija sew mill-irġiel kollha. Għalxejn. Meta jitlef il-flus kollha, il-Konti D’Alarcon joħroġ dokument biex jilgħab lil ibnu ta’ sentejn. Min daħal fir-razzett jitfa’ pala tal-bajtar lejhom. Jolqot lil wieħed u fil-konfużjoni jintefa d-dawl tax-xemgħa. Meta kollox jikkwieta, jinstab li l-aggressur serqilhom il-flus u d-dokument minn fuq il-mejda u l-kartiera tal-Balliju de Leon. Jasal Ġorġinu, l-ilsir tal-Konti u jgħidlu li xi ħadd daħal id-dar, qatel lil oħt il-Konti u seraq lit-tarbija. Għand l-Aħrax, l-id il-leminija tas-Sultan, jasal tallab b’ittra mingħand ċertu Josè. Jitlaq malajr kif isir jaf bil-wasla tal-Kontessa Leonilda. Wara jmur għandha, fejn jikxef l-identità tiegħu. Kien Ġann Nikola Dikler, il-qaddej ta’ missierha. Iżda għaliex kien spiċċa hekk? Jagħtiha kelma li jgħinha ssib lil binha misruq.