Hajti, Familja, Politika, Sport

Salvu Sant għex il-familja, il-politika u l-isport b’intensità sa minn tfulitu f’ċirkostanzi diffiċli. L-esperjenzi tiegħu għadhom imnaqqxin f ’moħħu bil-linji ċari ta’ memorja perfetta. Ir-rakkonti tiegħu lil Kenneth Vella issa qed jitwasslulek f ’dan il-ktieb.

F’dan il-ktieb Salvu Sant inaqqax il-karattru ta’ Dom Mintoff kif tant jafu tajjeb hu fuq għexieren ta’ snin b’tifkiriet ta’ ġrajjiet li qed jitwasslu lill-pubbliku għall-ewwel darba. Inaqqax ukoll il-karattru ta’ ħuh, Lorry, bla ma jagħmel xi apoloġija għalih, anzi jwassalhulna sħiħ u awtentiku. Jagħtina l-esperjenza mill-aktar personali tiegħu fl-interdett. Ipinġi stampa ġenwina ta’ ħafna mexxejja li hu jaf sewwa, fuq iż-żewġ xaqlibiet tal-politika Maltija. U ċertu ġrajjiet li jirrakkonta jistgħu jissorprendu lil dawk li jaħsbu li l-politika Maltija hi biss ġlieda tal-klieb u l-qtates.

Salvu Sant iwasslilna ħafna avvenimenti mill-esperjenza rikka u twila tiegħu fit-Tarzna, fil-karigi tiegħu fil-Partit Laburista, f’korporazzjonijiet tal-Istat Malti, fil-Parlament u f’għaqdiet sportivi. Minnhom kollha Salvu Sant joħroġ bħala raġel li essenzjalment hu Malti li jfittex is-sliem ma’ dawk kollha li forsi ma jaqblux kif għandhom iħobbuha lil Malta, jew kemm iħobbuha, imma li żgur jaqblu li huma lkoll aħwa wliedha.